Novas

O Xardín Botánico-Artístico de Padrón estrea sinalización. O Concello instalou un total de 50 placas ao lado das distintas especies que constitúen este xardín para identificalas. Nos paneis aparece o nome en galego e o nome científico da planta e ademais inclúese un código QR que conduce á páxina web https://xardinbotanico.padronturismo.gal/es/. Nesta dirección os usuarios e usuarias poderán ampliar a información e descargar fichas técnicas das especies.

Con estas 50 sinalizacións completase a primeira fase dun proxecto que seguirá executándose nos vindeiros meses. A concelleira de Turismo, Lorena Couso, sinalou que “malia que pola pandemia da Covid-19 tivemos que parar as visitas guiadas a este Xardín, este constitúe un dos principais reclamos de Padrón para turistas, peregrinos e visitantes. Por tanto dende o Executivo seguiremos actualizando e mellorando os recursos deste espazo”. 

O equipo do departamento de Turismo do Concello de Padrón elaborou unha extensa guía con todas as especies que dan forma a paisaxe deste enclave único do municipio. O catálogo distingue cinco categorías –especies singulares, especies monumentais, especies conmemorativas, por descubrir e elementos monumentais-. Este arquivo é o resultado dun minucioso traballo realizado polos técnicos de turismo de Padrón.

O xardín Botánico-Artístico de Padrón, declarado Ben de Interese Cultural en 1946, é un dos principais reclamos da localidade polo amplío abanico de especies que contén e porque está considerado como un dos principais xardíns da xeografía española. Ten unha extensión de aproximadamente unha hectárea e preserva preto de 300 especies, algunhas tan singulares como a palmeira de Senegal, a coroa de Cristo, o castaño de Indias, o carballo fastixiado ou a sequoia vermella-.

Durante este verán, o Concello de Padrón ofrece visitas guiadas ao Xardín Botánico-Artístico coa finalidade de promocionar e dar a coñecer o seu valor patrimonial entre a veciñanza e as persoas visitantes que durante esta época se achegan á vila. Esta actividade ampárase no marco do Plan de Reactivación do Sector Comercial e Turístico que o Concello de Padrón vén de deseñar tras a crise sanitaria do Covid-19.

As visitas guiadas, que se realizan durante os meses de xullo e agosto (todos os sábados ás 11.00h da mañá) son de balde e requiren de inscrición previa na Oficina de Turismo de Padrón, no teléfono +34 646 593 319 ou no correo turismo@padron.gal. O número máximo de participantes  é limitado (19 persoas por visita), atendendo ás normas de seguridade para a prevención do Covid-19.

O Concello de Padrón vén de crear cincuenta fichas técnicas das especies máis destacadas do Seu Xardín Botánico-Artístico. As fichas, que recopilan información detallada de interese das especies, así como a ubicación, ilustracións e fotografías, están dispoñibles en formato descargable na páxina web do Xardín Botánico, insertada dentro da web de Padrón Turismo.

O Concello de Padrón vén de crear unha web específica do Xardín Botánico Artístico coa que pretende dar maior visibilidade a este elemento patrimonial, declarado Ben de Interese Turistico no ano 1946.

A web, que estará aloxada dentro da propia de Padrón Turismo (padronturismo.gal), conta con información xeral do Xardín e dos seus elementos naturais e escultóricos, así como datos específicos das súas especies máis representativas. Ademáis, tamén garda un espazo dirixido á rapazada e á comunidade escolar, un tipo de público interesado especialmente nas visitas guiadas ao Xardín que, dende agora pode acceder a arquivos educativos descargables deste espazo natural.

O Concello de Padrón rendeu homenaxe aos seus voluntarios e voluntarias coincidindo coa conmemoración do Día Internacional do Voluntariado. Unha homenaxe presidida polo alcalde, Antonio Fernández, e a concelleira de Voluntariado, Lorena Couso, e que incluíu a plantación dunha árbore do voluntariado e a entrega dos primeiros Premios do Voluntariado, consistentes nunhas figuras de artesanía elaboradas por AMIPA, asociación de nais e pais de persoas con discapacidade intelectual da comarca do Sar.

O alcalde de Padrón agradeceu o labor dos voluntarios e voluntarias do municipio: “hoxe sodes 36, pero durante estes 21 anos de funcionamento da Oficina Municipal de Voluntariado pasaron máis de duascentas persoas que puxeron a súa gota e, gota a gota, puidemos facer o océano pois grazas a vós temos 10 programas en marcha dos que se benefician unhas 5.000 persoas de todas as idades”. Antonio Fernández puxo en valor o esforzo do voluntariado pois “ser voluntario non é fácil, se necesita tempo e implicación, pero é unha actividade moi gratificante porque facedes que esta comunidade sexa máis xusta e inclusiva”.

Pola súa banda, Lorena Couso puxo en valor os 21 anos de actividade da Oficina Municipal de Voluntariado, “persoas que ofrecen o seu tempo para facer actividades en favor da comunidade. A estas persoas que ao longo destes 21 anos participaron na OMV queremos darlles as grazas e convidar aos veciños e veciñas a participar nela”.

Xardón femia

A homenaxe comezou no xardín botánico, coa plantación dun xardón femia por parte dos voluntarios e voluntarias presentes. Acto seguido, todas as persoas presentes desprazáronse ata o auditorio, onde tivo lugar a entrega dos I Premios do Voluntariado por parte do alcalde de Padrón, a concelleira de Voluntariado e a técnica de Voluntariado, Pilar Lorenzo. Un acto conducido polo actor e humorista José Manuel Rodríguez Puente “Isi”, que se encargou tamén de amenizar a xornada contando uns contos.

Durante a homenaxe proxectouse un vídeo no que algunhas das persoas voluntarias expresaba o que o voluntariado significaba para cada unha delas, ao tempo que animaban a máis veciños e veciñas a sumarse a esta actividade. O acto rematou coa intervención de tres voluntarias que, en representación de todas as persoas presentes, deron lectura ao texto “O mundo” do escritor uruguaio Eduardo Galeano, no que asegura que “o mundo é iso. Un montón de xente, un mar de lumiños. Cada persoa brilla con luz propia entre todas as demais. Non hai dous lumes iguais”. Un texto que relacionaron co voluntariado pois “hai quen vive a vida con tanta paixón que fai que todo se acenda. Isto é o voluntariado e iso sodes todas vós, o calor humano, a luz”.

Un dos xardíns máis antigo de Galicia é o Xardín Botánico Artístico de Padrón, malia que a data exacta da súa orixe é descoñecida, a súa existencia aparece recollida nun documento de 1869, polo que en 2019 celebrouse o seu 150 aniversario. E o Concello de Padrón quere poñer en valor este espazo no que se atopan preto de 300 especies diferentes. Lorena Couso, concelleira de Turismo, sinalou que “o patrimonio da vila de Padrón é moi rico, como demostra este xardín, e por tanto hai que traballar intensamente na súa promoción e no seu coidado”.

Así, dende o último exercicio están deseñando novos folletos turísticos do Xardín para localizas as especies senlleiras, as monumentais e as conmemorativas –o folleto estará dispoñible na Oficina de Turismo en galego, castelán e inglés-, tamén están creando fichas das 50 especies que se atopan no xardín para que todas aquelas persoas interesadas poidan ampliar a información, xa que nelas tamén se recollerán datos como procedencia, características e curiosidades de cada especie. Ao mesmo tempo, estase elaborando material didáctico para público infantil, estanse sinalizando as especies máis representativas do xardín e estase creando unha páxina landing multisite asociada á web turística, na que se poderá acceder a todo este material, a imaxes, curiosidades e poderase reservar un visita guiada polo mesmo para grupos. 

Ao longo de todo o ano, realízanse visitas guiadas ao Xardín Botánico Artístico, tanto as xestionadas dende a Oficina de Turismo como as dirixidas a centros educativos. Durante os meses de verán increméntanse as visitas, xa que se sumas as que se dirixen a turistas e peregrinos. 

As visitas guiadas no xardín realízanse durante todo o ano, xestionadas dende a oficina de turismo e dirixidas a centros educativos, e durante os meses de verán amplíanse as visitas a turistas e peregrinos.